أنا محتج على المهزلة العسكرية

ولا تهنوا ولا تحزنوا وأنتم الأعلون

الحمد لله رب العالمين العالم بأحوال جميع العالمين

الحمد لله على كل حال وعلى كل شيء له الحمد وله الفضل والمنة

النهاردة وفي يوم أنتحار الديمقراطية الزائفة على لسان الحاكم الهزلي للمحكمة الهزلية العسكرية الذي أصدر حكم بمعاقبة المصلحين على إصلاحهم وبمعاقبة الشرفاء على شرفهم وبمعاقبة العلماء ورجال الأعمال وأساتذة الجامعات على خدمتهم لبلاده

أيوة همه كده همه الشرفاء المصلحين العلماء الدعاة إلى الله أصحاب الأيدي المتوضئة والقلوب النقية أساتذة وعلماء وأطباء ومهندسين

مكنوش همه اللي غرقوا البلد في المبيدات المسرطنة ولا همه اللي جابوا لمصر المركز 105 في الفساد ولا برضه همه اللي غرقوا أكتر من 1000 مصري في عبارات الموت ولا أصحاب الدم الملوث ولا نواب القروض ولا نواب التجنيد ولا أي حاجة من دي علشان كدة أتحاكموا

حسبنا الله ونعم الوكيل

أول ما قرأت الخبر على أمل الأمة وأنا مهموم جداً

جاء في بالي ساعتها قول الله تعالى " ولا تهنوا ولا تحزنوا وأنتم الأعلون إن كنتم مؤمنين "

أفتكرت الأية الكريمة " يا أيها الذين آمنوا اصبروا وصابروا ورابطوا واتقوا الله لعلكم تفلحون "

وتخيلت الظالمين وموقعهم من الأية الكريمة " ولا تحسبن الله غافلا عما يعمل الظالمون إنما يؤخرهم ليوم تشخص فيه الأبصار "

ياترى هم عارفين إنهم بكدة ظالمين وإن الظلم ظلمات يوم القيامة " ألا يظن أولئك أنهم مبعوثون "

ياترى الحاكم العسكري بسلامته لما يروح على بيته حيعرف ينام , ضميره مستريح , لما يشوف أولاده حيفتكر الأولاد اللي حرمهم من أبوهم , حيفتكر الأمهات اللي كان السبب في ظلم أبنائهم , طيب بلاش لما يقف بين يدي الله تعالى ويسأله عن حكمه ده حيقول أيه ؟؟؟!!!

حيقول أصل أنا عبد المأمور طيب وليه مكنتش عبد لله

وفي نفس الوقت اللي أتحكم فيها على الشرفاء من الإخوان المسلمين برأت المحكمة أعضاء بارزين في الحزب الوطني الفاسد بالبراءة في فضيحة أكياس الدم الفاسد بعد تأجيل وتأجيل وتأجيل في الحكم حتى ينسى الشعب القضية

ياترى الريس مبارك عارف التجاوزات اللي بتحصل في القانون والدستور على مرأى ومسمع من العالم كله و اللي واجعين دماغنا ليل نهار بأن الدستور فوق الجميع ؟؟؟؟

وياترى أمن الدولة عارفين إن فيه رب مطلع عليهم ويعرف خائنة الأعين وما تخفى الصدور ؟؟؟؟

وياترى ضميرهم كدة مستريح ؟؟؟؟

الإنتخابات المحليه

باطله .. باطله .. باطله

والمحكمة العسكرية

باطله.. باطله.. باطله

بحكم الدستور والقانون

مين يحترمهم ؟

حسبنا الله ونعم الوكيل

اللهم يارب العالمين يامالك يوم الدين يأرحم الراحمين أنك القائل وقولك الحق إنك تنصر دعوة المظلوم ولو بعد حين

اللهم عليك بمن ظلمنا اللهم عليك بمن ظلمنا

اللهم ياربنا " أني مغلوب فانتصر"

اللهم هون على أحبابنا وإخواننا

أحنا مش ساكتين

أحنا ولا بنخاف

محليات أخر حلاوة

الحزب الوطني حاطط دعايته فوق بعضيها والأطفال بتقطعها

النهاردة كانت المهزلة الإنتخابية ورغم إن الحكومة وأمن الدولة الهمام منع الإخوان وأي قوة معارضة حقيقية من الترشح للإنتخابات فرفع الإخوان قضايا قضت فيها المحكمة بحقهم في الترشح فرفض أمن الدولة التنفيذ وأغلق باب الترشيح فرفع الإخوان قضايا أخرى والمطالبة بحقهم الدستوري في الترشيح فقضت المحكمة بإدراج ناخبيهم في الكشوف الإنتخابية فرفض أمن الدولة مرة تانية تنفيذ أحكام القضاء ولأن القضاء فوق الجميع ونحن بلد القانون والكلام المهلبية ده كله رفض أمن الدولة تنفيذ قرار المحكمة وحكمها ببطلان الإنتخابات في كلاكيت تالت مرة. وبكدة يكون رجال أمن الدولة ضربوا رقم جنيس للأرقام القياسية في عدد الأحكام التي لم تنفذ في عدة أيام فقط وهي أكثر من 506 حكم قضائي وتحيا جمهورية أمن الدولة
وبالرغم من كل ده وإن الإنتخابات من أساسها باطلة وإن الحزب الوطني تقريبا بينافس الحزب الوطني إلا إن ده ممنعهمش من التزوير وكأنهم أصيبوا بداء التزوير المزمن وبقوا بيزورا على روحهم
النهاردة حصلت المهازل الأتية

أقبال جماهيري عالمي خطير جداً علي اللجان

1- نسبة الحضور لا تتعدي بأي حال من الأحوال 0.5 % ده بعد التحسين
2- ورق الإنتخابات قبل الإنتخابات بيوم موجودة على النت ونشرها موقع أمل الأمة وموقع جامعة أون لاين
3- وجبات للموظفين والمخبرين والظباط على حساب مرشحين الحزب الوطني
4- عربيات مليانة ناس بتعدي على كل لجنة (تصويت جماعي ياريس )
5- دخول ظباط أمن الدولة للجان وكل واحد يضع 150 ورقة أو 200 أو أكتر أو أقل كل واحد حسب وزنه
6- عربيات للمرشح الوطني في المنتزة طايل العتي بتدعوا الناس للإنتخاب بإستخدام شعارات الإخوان علشان الناس بيحبوا الإخوان
7- لقينا ورق الإنتخابات متقطعة ومرمية جانب لجنة مدرسة علي جاد ده طبعا بعد ما بدلوهم بورق جاهز ( ديلفري )
8- ضرب موظفة رفضت التزوير في أحد اللجان وخطفها في القسم ولم تخرج إلا بعد إنتهاء المسرحية الهزلية
9- أبويا الحاج كان في لجنة من لجان كرموز دخل أمن الدولة وقالهم يروحوا يصلوا الضهر ( تقوى وإيمان ) ولغاية ميعاد الصلاة مكانش فيه أي ورقة رجع لقي الصندوق مليان عارفين ليه ؟؟ كان في أحد المراقبين معاه كارنيه الحزب الوطني يعني حاميها حارميها ولما طلب من الحاج إنه يكمل تزوير علشان الخط يتغير رفض أبويا الله يكرمه
10- رغم خلو اللجان من الناخبين إلا إن الصناديق طالعة مليانة

شايفين النزاهة

نفس اليد اللي علمت

الورق ده من مدرسة علي جاد

والحمد لله كانت إنتخابات نزيهة جدا جدا جدا ومشرفة أوي أوي أوي
حسيبكوا دلوقتي مع حاجة كدة حصرياً لموقع أمل الأمة

يعني سبق صحفي وإعلامي ومتعرضتش في أي قناة إعلامية أو أي موقع أخر

الصناديق فاضية ليه أملاها بسرعة

كلنا كدة عايزين صورة

ده طبعا الحل بتاع الحاج زكريا عزمي رئيس ديوان رئيس الجمهورية

واللي أكيد بيندم على الكلمة دي إن الفساد في المحليات وصل للركب

بس ياريس زكريا أنتوا في الفساد معندكمش زمة ده حتى التزوير فاشلين فيه

بس أنا كان عندي سؤال نفسي أعرف ياترى أمن الدولة بيحمي الدولة فعلاً ؟؟؟؟

ولا بيحمي الريس ولا أبن الريس ولا النظام ولا المحتكرين ولا الحرمية وتجار المخدرات ؟؟؟؟
هو أكيد بيحمي أي حاجة إلا الدولة والناس الغلابة

والسؤال الأهم

ياتري الريس عارف اللي بيحصل ؟؟؟؟
لو عارف وساكت تبقي كارثة ولو مش عارف تبقي مصيبة وكارثة أكبر
ياريس يأمن الدولة ياوزير الداخلية يا حكومة الحزن الواطي
أحنا مش ساكتين

أحنا ولا بنخاف

ديمقراطية الحزب الوطني

ونعم الديمقراطية ديمقراطية الحزب الحاكم في مصر

بالفعل أثبت أن الديمقراطية في بعض دول العالم لها أنياب

إلا في مصر في أنياب بدون ديمقراطية

أنا حسيبكم مع شوية صور وكام فيديو كدة بيبينوا ديمقراطية حكام مصر وحزبهم الوطني والحكومة والأمن المصري

فعلا مفيش بعد كدة ديمقراطية

ونشوفكم بعد الفاصل

أمن طنطا الباسل يصد هجوم الأخوات ويضرب ببسالة منقطعة النظير ( ربنا يحميهم لعبطهم )

الأمن المصري ينفذ عملية إختراق للجامعة ويعتقل الطلاب من داخلها

دي كانت شوية فيديوهات وشوية صور تبين الديمقراطية الحقيقية وعاشت مصر حرة مستقلة

عفواً سيادة الوزير!!!!

من يومين بالظبط وبعد الوقفات الإحتجاجية في المحافظات كلها وأستخدام عناصر البلطجة الأمنية للقنابل المسيلة للدموع والرصاصات المطاطية وغيرها من ضرب للمرشحين ومحاولة أختطاف ليهم وخطف بعضهم من داخل أقسام الشرطة وأثناء تقديم ورق الترشيح في المحليات

طلعلنا وزير الداخلية " هامان النظام " بأنه سيلاحق جميع عناصر الإخوان

أمال أنتوا فاكرين إن سيادته كان حيقول سنلاحق الفساد و سنلاحق المفسدين ومحتكري الحديد والأسمنت

معاذ الله ولكن سيلاحق سيادته كل من يطالب بإصلاح هذا البلد

ولما الأستاذ الدكتور أسامة نصر مسئول إداري مكتب الإسكندرية للإخوان المسلمين رداً عليه :أما نحن فسنلاحق الفساد والمفسدين

فجن جنون سيادة الوزير بأعتبار إن اللي على راسه بطحة .....

فأعتقل بعدها حوالي 150 من جماعة الإخوان على مستوى الجمهورية منهم الأستاذ الدكتور أسامة نصر من بيته فجرأً

وأحنا ياسيادة الوزير بنقول لسيادتك بلاش تتعب الأمن المركزي ومصاريف سيادة اللواءات وأحنا عارفين إن مصاريف وزارتكم على قدكم

فأحنا بنقترح على الإخوان من خلال المدونة إننا بلاش نتعب سيادتك ونجيلك لغاية مكتبك وده بإذن الله قريب

ياسيادة الوزير الإخوان معروفين في كل حتة في المدارس وفي الشوارع وفي الكليات وفي النقابات وفي مجلس الشعب ومكاتب الإخوان معلن عنها ومعروف مين هو فضيلة المرشد ونواب فضيلة المرشد وهي جماعة معروفة علي مستوي العالم

سيادة الوزير وزارتكم مبقتش فاضية إلا لحماية الفساد والمفسدين من خلال ترك تجار المخدرات وتجار السلاح والسموم ومحتكري قوت الشعب والمرتشين وفضائح الأقسام والتعذيب والفساد اللي في المحليات واللي قال عنه رئيس ديوان رئيس الجمهورية إنه أصبح للركب

وأصبح شغلكم الشاغل هو ملاحقة الإخوان وكل من ينادي بإصلاح هذا البلد .

سيادة الوزير كان في أقتراح كدة إن سيادتكم تركزوا في شغلوكوا وتعملوا وزارة جديدة لملاحقة الإخوان والمصلحين .

وفي الأخر بنقول لسيادك إن سياستك وسياسة وزارتكم لن تزيد الإخوان إلا قوة وصمودا وتصميماً على الإصلاح

و إننا ولا مؤخذة

ولا بنخاف

علشان كدة حنعمل إضراب

من كام يوم كدة دخلت على موقع أمل الأمة أو زي ما أتغير وبقه إخوان الأسكندرية فوجدت فيديو لينا أيوة أحنا
أحنا دي يعني كل الشعب اللي بيوقف بالساعات أمام طوابير العيش
أنا وأنت وأبويا وأبوك وأخويا وأخوك
حال بالفعل يحّزن

ووصلتني بعديها بشوية أيام رسالة الإضراب العام في مصر يوم 6 إبريل

اضراب عام فى كل مصر

إتفقت كافه القوي الوطنية في مصر

علي أن يكون يوم 6 إبريل يوم إضراب عام في مصر

يوم 6 إبريل خليك قاعد في البيت أو شاركنا فى الميادين العامة

أوعي تنـــــــــزل لكن شاركنا

ماتروحشي الشغل

ماتروحشي الجامعه

ماتروحشي المدرسة ( حتعجب الطلبة أوي دي )

ماتفتحشي المحل

ماتفتحشي الصيدليه

ماتروحشي القسم ( ميقدروش يامعلم )

ماتروحشي المعسكر

عايزين مرتبات تعيشنا

عايزين نشتغل

عايزين تعليم لأولدنا

عايزين مواصلات أدمية

عايزين مستشفيات تعالجنا

عايزين دواء لأطفالنا

عايزين قضاء منصف

عايزين أمن وأمان

عايزين حرية وكرامه

عايزين شقق للعرسان ( أنا مع المطلب ده 1000000%)

مش عايزين رفع أسعار

مش عايزين محسوبيه

مش عايزين ظباط بلطجية

مش عايزين تعذيب في الإقسام

مش عايزين أتاوات

مش عايزين فساد

مش عايزين رشاوي

مش عايزين إعتقالات

مش عايزين تلفيق قضايا

قول لأصاحبك مايروحوش الشغل همه كمان وخليهم يدخلوا الإضراب

6 أبريــــــــــــل
... أضراب عام في مصر سلمي

أبعت رسايل لخمسة من أصحابك

ولو كل واحد بعت لخمسة في ظرف يومين البلد كلها حتعرف

بالموبايل بالأرضي بالأيميلات أو حتي رسايل عالشات في قنوات التليفزيون

أنسخوا رسالتنا وأبعتوها تعليق على كل المقالات ألي بتقروها

بيكوا وبينا البلد دي حتتغير إن شاء الله

فحبيت أنشر معانتنا جنباً إلى جنب ( شوية فصحي ) مع اللي ممكن أحنا نعمله ويكون ليه وزن

مع إني تقريباً الوحيد اللي بيدخل على المدونة دي

( وده طبعا واضح من العداد اللي وقف من كتر العد )

إلا إن ده مش حيمنع إني أشارك ولو بالتدوينة دي علشان بلدنا نشوفها حرة

ويوم..... يوم نقول للنظام إننا ولا بنخاف