سلامتك يادكتور إبراهيم

النهاردة الدكتور الزعفراني المعتقل علي خلفية مناصرة إخوانا في غزة أجري عملية قسطرة وسط تواجد أمني كثيف ومنعوا أي فرد يدخل علي الدكتور إلا الأطباء المعالجين

( شكلهم كانوا خايفين إنه يهرب)

وبعد العملية أمر الطبيب المعالج أن يلتزم دكتور إبراهيم الراحة التامة علشان متحصلش أي مضاعفات وهو متواجد الأن في الغرفة رقم 505 فى المبنى التعليمى الجديد بالدور الخامس بالمستشفى الاميرى الجامعى

والحمد لله حالته الأن مستقرة

ألف سلامة ليك يادكتور إبراهيم

نسأل الله العظيم رب العرش العظيم أن يشفيك

وأن تخرج إلينا سالما غانما الأجر بإذن الله

مصدر الخبر : أمل الأمة

مطلوب بودي جارد

"مطلوب بودي جارد" هذا هو الاعلان الذي سيضعه كل طالب في الصحف بعد المهزلة التي حدثت في مجمع نظري بالأسكندرية ، فلن يأمن أي طالب من أن يدخل "الحرم الجامعي" دون أن يكون معه الحماية اللازمة خشية أن يتعرض للاهانة من سب وضرب وكسر أو ربما يتعرض للموت ، دون أن تتحرك إدارة الكلية – إلا بعد أن تحقق و تكتشف أن الطالب هو بالطبع المخطئ ......!!

لا تتعجبوا فهذا ماحدث العام الماضي عندما أعتدى الأمن بالضرب على الطالب "مهند" فتقدم بشكوى رسمية وكانت النتيجة سجنه وأعتقاله وفصل من وقف بجانبه .

أن ما يحدث موجه للطلبة عامة وليس لطلبة الأخوان فقط ، فالغرض منه هو إرهاب الطلبة وإبعادهم عن أي نشاط سياسي أو غير سياسي أو المطالبة بحقوقهم ، وتحويلهم إلى السلبية والأنكماش خوفا أن يتعرضوا لمثل ما يتعرض إليه طلبة الأخوان .

ولمتابعة الموضوع ممكن تزوروا موقع

جامعة أون لاين

ونسبكم مع صور المهزلة

بلطجية جوة الجامعة " تعيش جامعتنا حرة مستقلة "

دعونا نعمل في صمت أوقفوا التصوير

أثار موقعة جامعة الأسكندرية

من أهم نتائج التطبيع مع الصهاينة أستيراد وسائل جديدة في الخطف "سيارات الخطف"

ما لازم يا سيادة العميل يكونوا عمال زيك عند أمن الدولة

وبالرغم من كده بنوجه رسالة إلى البلطجة الأمنية

و إدارات الكليات بالجامعة المتواطئين
أننا ...... ولا بنخاف

" أتشتمه وانا على دينه "

" أتشتمه وانا على دينه أقول ما يقول , فرد ذلك علي إن أستطعت"

كلمة قالها أسد الله حمزه بن عبد المطلب رضى الله عنه

قالها لرأس الكفر في مكة أبو جهل

ونقولها اليوم لكل من سب رسول الله صلي الله عليه وسلم

ومن تابع قصة سيد الشهداء يجد أنه قالها وهو على الكفر

ولم يسلم إلا فى اليوم التالي .

لو تأملت الكلمات أكيد حاتحس بالعزه والكرامة

كلمه صغيره عجز حكام المسلمين انهم ينطقوا بها ولو في أنفسهم

سكوت حكامنا اللي حسسنا بالذل والعار والمهانة .

لما تخرج الشعوب المسلمة نصرة لنبينا الكريم ومفيش أي موقف رسمي قوي

مجرد أستدعاء لسفير الدنمارك ....!!!!!

" طيب أنا نفسي أعرف عملوا ايه ليه في الأستدعا ده ودوه أمن الدولة زي ناس ولا قلولوا يابابا كخ كدة متعملش كدة تانى "

أنا شايف أن نشرالصور دى مره تانيه إنما هو بمثابة تحدى وإستهزاء بمشاعر مليار ونص مسلم على مستوى العالم .

الحكومه مش حتعمل حاجه على الرغم من الدور الخطير اللي ممكن تعمله من طرد سفير الدنمارك وإستنكار شديد اللهجه للحكومة الدنمركية ومقاطعة كل العلاقات مع الدنمارك .

ولكن للاسف الشديد الحكومه مش فاضية إلا للأمن السياسى والقضاء على الإخوان

فحنكبر دماغنا من الحكومة ونشوف أحنا ممكن نعمل أيه ؟؟؟؟؟

ولوشفنا الدور اللى على كل واحد فينا يتلخص فى جمله

"الرجوع إلى سنة الحبيب محمد"

مش معقولة نكون بنحبه ومبنعملش بسنته

مش معقولة نكون بنحبه ولسه بنشتري منتجات دنماركية
مش معقولة نكون بنحبه ومنعرفش سيرته

أنتوا عارفين يعني أيه يتشتم نبينا وحبيبنا وخير البرية

والله ياجماعة الموضوع خطير ومش بسيط

ولو فيه حاكم عنده نخوة ولا ذرة رجولة كانت طارت فيها رقاب

فلنعاهد المولي سبحانه وتعالي ونجدد البيعة مع الله علي نصرة حبيب المولي عزوجل والعمل بسنته ومعرفة سيرته .

و كلنا بندور علي حب ربنا أهو مفتاح لحب المولي لينا " قل إن كنتم تحبون الله فاتبعوني يحببكم الله و يغفر لكم ذنوبكم و الله غفور رحيم "

ومن المهم أننا نقول لكل العالم إننا

ولا بنخاف

ضد المخدرات

لما تكون في وسط مسيرة بالشكل ده

لما يكون الناس كلها طالعة علشان تمنع الخطر ده

لما نكون كلنا وافقين مع بعض ضد المخدرات

لما تلاقي الناس خرجت للشارع علشان تقول رأيها

علشان تقول لأ للمخدرات

علشان تقول لتجار السم الهاري كفاية

علشان تقول لو في يوم عجزت حكومتنا أحنا مش عاجزين

أنبارح أيوة انبارح كنت مع الناس دول في المسيرة اللي خرجت من المسجد

وكان علي رأس المسيرة الأستاذ مصطفي محمد مصطفي عضو مجلس الشعب

اللي أتكلم وبقوة عن المشكلة وإنها مش بس تخص الحكومات اللي اصبحت عاجزة اقدامها وانشغلت بالأمن السياسي علي حساب الامن الإجتماعي

اتكلم اننا مستعدين لكل التضحيات علشان اولادنا يعيشوا في سلام وبعيد عن تجار السموم دول

تجار السموم اللي بقوا علي كل ناصية وبيبيعوا سمومهم علي عينك ياتاجر


كان في المسيرة دي كتير من رموز المنطقة اللي اتكلموا وحثوا الناس كلها علي ضرورة التصدي للظاهرة دي

ولازم نحسس المسئولين بخطورة الموضوع علشان كدة تم توزيع ورقة فيها ارقام تليفونات لمباحث المخدرات ومحافظ الاسكندرية ومديرية الامن



يبقي ناقص ايه

ناقص إننا نتحرك ونتصل لما يبقي في اي حاجة ومنكبرش دماغنا

لأن لما انا اتصل محدش حيسأل فيه (المسئولين عندنا علي قلوبهم مراوح عسل)


إنما لما أنا أتصل

وانت تتصل

وغيرك يتصل

والأم اللي خايفة علي ابنها تتصل

والأب اللي شايف ابنه ممكن ينجر للطريق ده يتصل

لما المسئولين يلاقوا ألف أتصال

والأتصالات مبتبطلش من عندهم أكيد حيهتموا

( أو حيعملوا حركة ندالة ويغيروا نمر تليفوناتهم )



عايزين كدة كلنا نبقي أيد واحدة أقدام الخطر ده ومنكتفش أيدينا وأهم حاجة إننا نصرخ في وش الظلم ونقول


ولا بنخاف

تضامناً مع غزة

كلمة أستطاع الفنان أمير قلوب الشباب أبو تريكة أن ينشرها أسرع من جميع المظاهرات ومن جميع الخطب التي بذل دعاتنا المخلصون لها كل ما يستطيعوا لحشد قلوب الناس للقضية الفلسطينية

نفس القضية اللي أخوانا المعتقلين محمد مدني و محمود محمد وغيرهم أتقبض عليهم بسببها والتهمة محاولة دعم غزة ؟؟؟!!! وعجبي

أكتر من 15 يوم ولسه محمد مدني في قبضة الأمن

أكتر من 15 يوم والتهمة التضامن مع غزة
أكتر من 15 يوم ولم يسرق أموال بنوك أو يغرق عبارة أو يحرق قطار

مش عارف لأي جهة ينتمي أمن الدولة وأي دولة اللي بيحفظ أمنها علشان يقبض علي ناس كل تهمتهم هي محاولة التضامن مع غزة ؟؟؟؟

بجد يامحمد وحشتني أوي ووحشني كلامك وتحليلك للأوضاع

وحشتني ضحكتك حتي أختلافك معايا في وجهات النظر وحشتني

أنا مش عارف حتقرا الكلام ده ولا لأ بس حبيت أوصلك إن حبايبك كلهم مستنينك

حبيت أقولك أنك وحشتنا كلنا أنا ومفرح والعيسوي ومحمد سعد و كل الناس هنا

لا أملك إلا أن أدعوا الله لكم فأنتم نعم رجال الوطن

فك الله أسركم جميعا ورزقكم الأجر والثواب

وفي الأخر بنجدد عهدنا إننا

ولا بنخاف